Равил Әхмәтшин Тукай исемендәге Югары мәктәбенең 1нче курс студентлары белән очрашты
Татарстан вице-премьеры - Татарстанның Россиядәге Тулы вәкаләтле вәкиле Равил Әхмәтшин Казан федераль университетының (КФУ) Филология һәм мәдәниятара багланышлар институты Габдулла Тукай исемендәге Милли мәдәният һәм мәгариф югары мәктәбенең беренче курс студентлары белән очрашты. Бу хакта тулы вәкаләтле вәкиллек матбугат хезмәте хәбәр итә.
Әңгәмә КФУ Попечительләр советы әгъзаларының университетта укый башлаган студентлар белән традицион очрашуларының берсе булды. Беренче белеме буенча филолог булган Равил Әхмәтшин совет составына керә.
ТР вице-премьеры Мәскәүдә Татарстанның Тулы вәкаләтле вәкиллегенең эше, аның максатлары һәм бурычлары турында сөйләде, ул аны 2010 елдан бирле җитәкли. Кыскача Россия башкаласында яшәүче татарстанлыларны (шул исәптән яшьләр вәкилләрен) берләштерү тырышлыгына тукталды. Очрашу азагында студентлар спикерга сораулар бирде.
Равил Әхмәтшин беренче курс студентлары белән очрашуга һәрвакыт бик теләп килүен әйтте. «Традиция буенча өлкән буын кайвакыт яшьләрне сүгә, әмма мин уйлыйм һәм һәрвакыт шуны әйтәм: безнең яшьләр искиткеч!», — дип өстәде ул.
Татарстанның Россиядәге Тулы вәкаләтле вәкиле шулай ук үзенең студент тормышы турында сөйләде һәм укытучылар турындагы хатирәләре белән уртаклашты.
Чараны КФУның Филология һәм мәдәниятара багланышлар институты директоры Рәдиф Җамалетдинов ачты. Очрашуда шулай ук Габдулла Тукай исемендәге Югары Милли мәдәният һәм мәгариф мәктәбе укытучылары катнашты.