Рәис Синьцзян Кытай Коммунистлар партиясе комитеты секретаре урынбасары белән очрашты
Татарстан Рәисе Рөстәм Миңнеханов бүген Синьцзян-Уйгыр автономияле районы Кытай Коммунистлар партиясе комитеты секретаре урынбасары, Синьцзян җитештерү-төзелеш корпусы рәисе, China Xinjian Group компаниясе идарәсе рәисе Хэ Чжунъю белән очрашты. Бу хакта республика җитәкчесе матбугат хезмәте хәбәр итә.
Очрашу ТР Хөкүмәте йортында узды. Элегрәк Кытай Халык Республикасы Синьцзян-Уйгыр автономияле районы делегациясе Казанга эшлекле сәфәр белән килде. Кунакларны сәламләп, Рөстәм Миңнеханов Россия төбәкләренә игътибар күрсәткән өчен рәхмәт белдерде. Ул шулай ук Россия-Кытай мөнәсәбәтләре актив үсүен һәм моңарчы күрелмәгән дәрәҗәгә ирешүен билгеләп үтте.
«Безнең илләр арасында товар әйләнеше арта. Узган ел ул 228 миллиард Америка долларын тәшкил итте. Безнең лидерлар (Владимир Путин һәм Си Цзиньпин – Т-и иск.) 2030 елга кадәр сәүдә күләмнәрен арттыру, кайбер стратегик юнәлешләр буенча элемтәләрне тирәнәйтү бурычын куйды. Бу иң элек финанс, сәнәгать, технологик юнәлешләр, шулай ук транспорт һәм логистика өлкәләре», – диде ул.
Татарстан Республикасы Рәисе Казанда күптән түгел 16нчы БРИКС саммиты узуны искәртте. «Без шул исәптән Кытай Халык Республикасы лидеры Си Цзиньпин әфәндене кабул итү хөрмәтенә ирештек. Казанда дөнья державасы лидерын кабул итү безнең өчен зур дәрәҗә булды. Без бу вакыйга белән горурланачакбыз», – дип ассызыклады ул.
Республика җитәкчесе шулай ук Татарстан делегацияләре даими рәвештә Кытайда була, дип билгеләп үтте. «Узган ел мин Шанхайда һәм Аньхой провинциясендә булдым. Шулай ук ноябрьдә Шеньчжэньдә югары технологияләр ярминкәсен карадым. Быел апрельдә Урумчи шәһәрендә (Синьцзян-Уйгур автономияле районы башкаласы — Т-и иск.) «Китай — Евразия» ЭКСПОсында булдым», - дип санап китте ул.
Моннан тыш, Миңнеханов билгеләп үткәнчә, Татарстан Кытайның сигез провинциясе белән хезмәттәшлек турында килешү төзегән. Шулай ук төбәк муниципаль берәмлекләре белән Кытай Халык Республикасы муниципаль берәмлекләре арасында килешүләр төзелгән. Мәсәлән, ТР башкаласы Казан Кытайның җиде шәһәре белән тугандаш мөнәсәбәтләрдә.
«Безнең мөнәсәбәтләргә Кытай Халык Республикасының Казандагы генераль консуллыгы бик нык ярдәм күрсәтә», - дип ассызыклады ТР Рәисе. Ул Кытайның Казандагы генераль консулы һәм гомумән Кытайның Россиядәге илчелеге яхшы нәтиҗәле эшчәнлек алып баруын билгеләп үтте. Миңнеханов Татарстан проектларында сәүдә-икътисади мөнәсәбәтләр генә түгел, Кытай Халык Республикасы инвестицияләре дә сизелерлек роль уйнавын искәртте.