Райнур Хәсәнов: Халыкның рухи байлыгы хуҗалары юк – ул бөтен җәмгыятьнеке
Татарстан арбитраж суды, товар билгесе буенча хокуклар бозылу аркасында, Шүрәле сыннарын юк итәргә карар иткән. Бөтендөнья татар яшьләре форумы рәисе Райнур Хәсәнов әлеге хәлгә карата фикерен белдерде.
– Казаннан бер оешма татар халык әкиятләре каһарманнарын патентлап, аларны куллану өчен башкалардан үзенә акча түләтергә маташканы билгеле булды. Каһарманнар арасында: Шүрәле, Су анасы, Камыр батыр, Кар кызы. Хокукый шикаятьләрнең берсе Татар дәүләт «Әкият» курчак театрына килгән иде.
Без шундый шикаятьләрне алган театрларны яклап чыгабыз һәм халык байлыгына кул сузган оешманы хурлыйбыз. Искә төшерәбез: «Авторлык һәм янәшәлек хокуклары турында» федераль канунының II бүлеге, 8нче маддәсе буенча, халык иҗаты әсәрләре авторлык хокукы объекты була алмый.
Бу хәл безнең өчен зур борчылу уята. Шүрәле – татар халкының мөһим образы, һәм аңа карата чыгарылган карарны гаделсез һәм урынсыз дип саныйбыз. Халыкның рухи байлыгы хуҗалары юк – ул бөтен җәмгыятьнеке, бөтен буынныкы, – диде ул.
Татар халык әкиятләре геройларын пантентлаштыру мәсьәләсенә карата җәмәгатьчелек фикерен «Интертат» сайты өчен Зилә Мөбәрәкшина белеште.
