Сәясәт 8 сентябрь 2024 16:16

Рәфыйк Мөхәммәтшин: Сайлаулар – беренче чиратта ышаныч ул

Скопировать ссылку

Социологик сораштырулар буенча, VII чакырылыш Татарстан Дәүләт Советына депутатлар сайлауга килүчеләр саны 65тән 70 процентны тәшкил итә. Бу хакта ТНВ телеканалында «Гаилә белән сайлыйбыз!» телемарафоны эфирында республика мөфтие урынбасары, Россия ислам институты ректоры Рәфыйк хәзрәт Мөхәммәтшин әйтте.

«Сайлаулар – ул беренче чиратта ышаныч. Халыкның хакимият органнарына, республика принципларына, дәүләт җитәкчелегенә ышанычы. Шул яклап карасак, бүген Татарстан – Россиянең иң алган киткән төбәкләренең берсе. Монда социаль-икътисади мәсьәләләр дә хәл ителә, һәм Казанны да бүген Европа шәһәре дип атап була. Шуңа күрә, бездә ышаныч өчен бөтен шартлар да бар. Ә ышану – ул сайлауларга бару дигән сүз», – диде Мөхәммәтшин.

Шулай ук ул, сайлаулар гаилә әгъзаларын берләштерү өчен яхшы мөмкинлек диде.

«Иртән торасың, бергәләп иртәнге аш ашыйсың, җыенып чыгып китсәң һәм сайлауларда катнашасың. Әмма балалар моның бәйрәм генә булмавын да аңларга тиеш. Алар моның әти-әниләре өчен зур җаваплылык икәнен аңларга тиеш. Шул уңайдан, бу әлбәттә, тәрбиянең билгеле бер формасы: бала ниндидер җитди эшкә катнаша булып чыга», – диде РИИ ректоры.

Сайлаулар алдыннан Рәфыйк Мөхәммәтшин үзенең студентлары белән сөйләшүләр уздырган, сайлау участогына барып, тавыш бирү мөһимлеген сөйләгән.

«Бүген Татарстанда тулы дини белем алу өчен бөтен мөмкинлек тә бар диярлек. Кызларыбыз рәхәтләнеп хиҗаб киеп, яулык бәйләп йөри ала, бездә бик толерант җәмгыять. Хәләл-кафелар бар. Ягъни, бөтен шартлар да тудырылган (мөселманнар өчен). Шуңа күрә студентларыма да: «Сез үз тормышыгыздан чыгып, сайлау ясарга тиеш», дип әйтәм», – дип йомгаклады ул.

Сәхифәләр

Рәфыйк Мөхәммәтшин: Сайлаулар – беренче чиратта ышаныч ул