Рафис Корбан Дагстанда Рәсүл Гамзатовка багышланган әдәби форумда катнашты
«Ак торналар» фестивале 1986 елдан бирле Дагстан Язучылар берлеге тарафыннан үткәрелә.
(Казан, 24 сентябрь, «Татар-информ», Рузилә Мөхәммәтова). Язучы Рафис Корбан Дагстанда Рәсүл Гамзатов истәлегенә багышланган «Ак Торналар» халыкара әдәби фестивалендә катнашты. Бу хакта «Татар-информ» хәбәрчесенә язучы үзе хәбәр итә.
- «Ак торналар» фестивале 1986 елдан бирле Дагстан Язучылар берлеге тарафыннан үткәрелә. Ул Рәсүл Гамзатовның «Торналар» җыры белән бәйле һәм язучының инициативасы белән башланган. Фестивальдә Россиянең төрле төбәкләреннән килгән язучылар, шагыйрьләр катнаша.
«Бу форумда Дагстан Язучылар берлегенең махсус чакыруы белән өченче тапкыр катнашуым. Форумнар язучыларга үзара аралашырга, бер-берсенә иҗатларын танытырга мөмкинлек бирә. Быелгы фестивальгә тәрҗемәчеләр җыйналган иде. Соңгы елларда тәрҗемә белән актив шөгыльләндем. Дагстанда яшәүче кумык, ногай, авар, табасаран шагыйрьләренең шигырьләрен татарчага тәрҗемә итеп, берничә китап бастырып чыгардым», - ди Рафис Корбан.
«Фестиваль кысаларында Махачкалада Россия Язучылар берлеге секретариатының күчмә утырышы узды. Әлеге берлекнең беренче секретаре Геннадий Иванов шагыйрьләрдән «Конек-горбунок» әкиятенең авторы Ежовның тууына 160 ел тулу уңаеннан, әкиятнең башламын төрле телләргә тәрҗемә итеп бирүләрен сорады. Мин әкиятнең билгеләнгән өлешен татар теленә тәрҗемә иттем», - ди язучы.
Рафис Корбан Дагстан Язучылар берлеге белән яшьли вафат булган ногай шагыйрәсе Кадриянең шигырьләрен татар теленә тәрҗемә итү буенча сөйләшүләр алып барган.