Рафис Борһанов бүгенге заман педагогы ия булырга тиешле сыйфатларны әйтте
Республиканың яшь укытучылары белән очрашу Казанның 180нче гимназиясендә узды.
(Казан, 20 август, “Татар-информ”). Бүген Татарстан мәгариф һәм фән министры Рафис Борһанов республиканың яшь укытучылары белән очрашуда хәзерге заман педагогы ия булырга тиешле сыйфатларны әйтте. Очрашу Казанның 180нче гимназиясендә узды.
“Бүгенге көндә дә педагог элеккеге таләпләргә җавап бирергә тиеш дип уйлыйм. Беренчедән, ул үз һөнәрен бик яратырга тиеш. Икенчедән, кемнәрне өйрәтә, шуларны яратсын ул. Бу беренчел. Өченчедән, ул үз предметын яхшы белергә тиеш. Яңа технологияләрне куллана белү мөһим”, - диде Татарстан мәгариф һәм фән министры.
“Без мәктәптә укыганда бар укытучы да авторитетлы иде. Аны бернинди указ белән дә алып булмый, ул еллар буе туплана. Минемчә, үз һөнәреңне, укучыларны яратырга һәм бүгенге көндәге яңалыклар артыннан өлгерергә кирәк”, - дип өстәде вице-премьер.
