Рафаэль Ильясов соңгы әңгәмәсендә Илһам Шакировны алыштырыр шәхесләр юклыгын әйтте
Бүген җәмәгатьчелек Татарстанның халык артисты Рафаэль Ильясовны соңгы юлга озатты.
(Казан, 10 декабрь, «Татар-информ», Рузилә Мөхәммәтова). Бүгенге мәдәни тормышыбызда Илһам Шакиров, Рөстәм Яхин, Нәҗип Җиһанов кебек шәхесләрнең булмавы үзен сиздерә, дип саный иде Татарстанның халык артисты Рафаэль Ильясов. Бу хакта ул моннан бер ай элек «Татар-информ» хәбәрчесенә биргән интервьюсында әйтте.
«Илһам бик тәҗрибәле шәхес иде. Җырчының авызы ачылуга моннан буламы-юкмы икәнен билгели иде», — дип искә алды Рафаэль Ильясов легендар җырчыны әлеге әңгәмәдә.
«Хәзер Илһам юк. Юксынабыз. Аны алыштырырлык кеше күренми. Андый җырчылар меңгә бер генә була торгандыр. Рәшит Ваһаповлардан соң ул берүзе килеп чыкты да, якты кояш кебек татар дөньясын яулап алды. Башка андыйлар юк», — дигән иде ул.
Моннан бер ай элек җырчы «Татар-информ»га килеп интервью биргән иде. Әлеге әңгәмә бүген беренче тапкыр тәкъдим ителә. Артист аны үзе карап чыгарга тиеш иде. Ул аны күрә алмый калды.