Икътисад 18 май 2021 15:19

Рөстәм Миңнеханов Үзбәкстан делегациясе вәкилләре белән очрашты

Татарстан Президенты сүзләренчә, соңгы вакытта Үзбәкстандагы партнерлар белән хезмәттәшлек актив үсеш кичерә.

Скопировать ссылку

(Казан, 18 май, «Татар-информ», Надежда Захарова). Татарстан Президенты Рөстәм Миңнеханов һәм Үзбәкстан делегациясе товар әйләнешен яңадан торгызу һәм арттыру, шулай ук сәламәтлек саклау һәм IT өлкәләрдә уртак проектларны гамәлгә ашыру, ишегалларын төзекләндерү һ.б. өлкәләрдә үзара тәҗрибә уртаклашу хакында фикер алышты. Очрашу Казан Кремлендә узды, дип хәбәр итә ТР Президентының матбугат хезмәте.

Ташкент шәһәре хокиме Жахонгир Артикходжаев җитәкчелегендәге Үзбәкстан делегациясе Казанга рәсми сәфәр белән килде. Делегация әгъзалары иҗтимагый киңлекләр, парклар, скверлар булдыру һәм үстерүдә Татарстандагы коллегаларының тәҗрибәсен өйрәнде инде. Аларны күп фатирлы торак йортларның ишегалды территорияләрен капиталь ремонтлау мәсьәләсе дә кызыксындырды. Аерым алганда, алар Горки-Әмәт урманында, «Ак чәчәкләр» бульварында һәм «Урам» экстрим-паркында булды. Аннары ТР Милли китапханәсендә алар өчен Казансу елгасының Яр буе территорияләрен үстерү стратегиясен тәкъдим иттеләр.

Татарстан Президенты әлеге өлкәләрдә республика тәҗрибәсе белән кызыксынганнары өчен очрашуда катнашучыларга рәхмәт белдерде. Ул шулай ук Казанның 175нче гимназиясендәге фаҗигадә һәлак булучылар һәм зыян күрүчеләрнең гаиләләренең кайгысын уртаклашканнары өчен Үзбәкстан җитәкчелегенә рәхмәт сүзләрен җиткерде.

Рөстәм Миңнеханов сүзләренчә, соңгы вакытта Үзбәкстандагы партнерлар белән хезмәттәшлек актив үсеш кичерә. Әйтик, Үзбәкстан Премьер-министры Абдулла Арипов күптән түгел Казанда узган Евразия икътисади берлеге утырышында катнашты. 2019 елда ТР Президенты эш сәфәре белән Ташкент һәм Сәмәркандта булды.

#Рөстәм Миңнеханов

Сәхифәләр

Рөстәм Миңнеханов Үзбәкстан делегациясе вәкилләре белән очрашты