Рөстәм Миңнеханов «Учительская газета»ның баш мөхәррире Петр Положевец белән очрашты
«Учительская газета»ның баш мөхәррире фикеренчә, бер ел эчендә Россия алга гаять зур адым ясаган.
(Казан, 12 декабрь, «Татар-информ»). Бүген Татарстан Республикасы Президенты Рөстәм Миңнеханов «Учительская газета»ның баш мөхәррире Петр Положевец белән очрашты, дип хәбәр итә республика лидерының матбугат хезмәте.
Казан Кремлендә узган очрашуда ТР Премьер-министры урынбасары – мәгариф һәм фән министры вазифаларын башкаручы Рафис Борһанов һәм ТР Президенты ярдәмчесе Ләйлә Фазлыева катнашты.
Әңгәмә барышында Петр Положевец Рөстәм Миңнехановка гражданнар белеме мәгарифе сыйфатын халыкара чагыштырма тикшерү йомгаклары турында сөйләде. Ел дәвамында халыкара экспертлар - мәктәпләрдә белем бирү, мәгариф оешмасы белән идарә итү, укучыларның гражданлык позициясен формалаштыруга йогынты ясый торган мәктәптән тыш климатны булдыру үзенчәлекләрен бәяләгән.
«Учительская газета»ның баш мөхәррире фикеренчә, бер ел эчендә Россия алга гаять зур адым ясаган: элек циклда 19нчы урынны алса, хәзер рейтингта 7нче баскычка күтәрелгән.
Аннары очрашуда катнашучылар белем бирү системасын үстерү мәсьәләләре турында фикер алышты.