Рөстәм Миңнеханов Теләчедә язгы кыр эшләренең барышы белән танышты
Рөстәм Миңнеханов җаваплылыгы чикләнгән “Игенче” ширкәтенең чәчү алдынгыларына кызыксындыру премияләренең сертификатларын тапшырды.
(Теләче, 11 май, "Татар-информ", "Теләче-информ", Фәнил Нигъмәтҗанов). Бүген, 11 майда Теләче районына эшлекле сәфәрендә республика Президенты Рөстәм Миңнеханов очкычтан язгы кыр эшләренең барышы белән танышты. Бу турыда җирле басма хәбәр итә.
Аны Татарстан Премьер-министры урынбасары, авыл хуҗалыгы һәм азык-төлек министры Марат Әхмәтов, муниципаль район башлыгы Илдус Зарипов озатып йөрде.
Азактан, ул җаваплылыгы чикләнгән “Игенче” ширкәтенең күпъеллык үлән басуында авыл хуҗалыгы предприятиеләре, крестьян-фермер хуҗалыклары җитәкчеләре, авыл җирлекләре башлыклары белән очрашты, аларның уй-фикерләре белән кызыксынды.
Рөстәм Миңнеханов җаваплылыгы чикләнгән “Игенче” ширкәтенең чәчү алдынгыларына кызыксындыру премияләренең сертификатларын тапшырды. Президентны басу-кырлардагы эшнең барышы, район тормышы һәм республика программалары нигезендә алып барылучы капиталь ремонт, төзелеш эшләре белән муниципаль район башлыгы Илдус Зарипов таныштырды.
Аннары, икенче тукталыш буларак, республика башлыгы Рөстәм Миңнехановка бер ел дәвамында капиталь ремонт үткәрелгән һәм күптән түгел генә май, сыр җитештерелә башлаган Теләче сөт-май комбинаты тәкъдим ителде. Район кунакларын Теләче сөт-май комбинаты буенча комбинат директоры Раилә Хисмәтуллина озата йөрде. Аңарчы Рөстәм Миңнеханов комбинатның ишегалдында район эшмәкәрләре һәм алар тарафыннан җитештерелгән продукция үрнәкләре белән танышты.
Өченче тукталышта - Рөстәм Миңнеханов районда җаваплылыгы чикләнгән “ТопГаз” ширкәте тарфыннан Теләчедә төзеләчәк сыекландырылган газ заводы проекты белән танышты.