Рәсми Татарстан 1 июнь 2017 09:37

Рөстәм Миңнеханов: Татарстан Россия дәүләт тарихы архивы белән хезмәттәшлекне үстерә

Татарстан Президенты Петербургка эшлекле сәфәре вакытында Россия дәүләт тарихы архивында булды.

Скопировать ссылку

(Казан, 1 июнь, “Татар-информ”). Татарстан Президенты Рөстәм Миңнеханов бүген Санкт-Петербургка эшлекле сәфәре вакытында Россия дәүләт тарихы архивында булды. Бу хакта республика башлыгы матбугат хезмәте хәбәр итә.

Татарстан лидерына архив буенча экскурсияне Россия дәүләт тарихы архивы директоры Сергей Чернявский үткәрә. Ул архив тарихы, документларны саклауны тәэмин итү һәм фәнни эшчәнлек турында сөйләп уза.

Татарстан Президенты документларны цифрлаштыру бинасында, уку залында һәм күргәзмә өлешендә була. Аерым алганда, Рөстәм Миңнеханов Сергей Виттенең акча реформасының 120 еллыгына багышланган күргәзмә экспонатлары белән таныша.

Архивта Татарстан Президентына Казан өязе һәм татар халкы тарихына багышланган документларны күрсәтәләр.

Рөстәм Миңнеханов, Сергей Чернявскийга рәхмәт белдереп, архив эшчәнлеген югары бәяли. “Сез, Россия дәүләте тарихының бәһасыз документларын саклауны тәэмин итеп, бик мөһим эш башкарасыз. Татарстан - Россия дәүләт тарихы архивы белән хезмәттәшлекне үстерү белән кызыксына. Мин ышанам, без архив буенча белгечләр арасында тыгыз элемтәләр урнаштыра алачакбыз”, - дип билгеләп үтә ул.

Республика башлыгын Татарстан Президенты ярдәмчесе Альберт Нәфыйгин, Татарстан Президенты ярдәмчесе Радик Гыйматдинов, Республика хезмәт, халыкны эш белән тәэмин итү һәм социаль яклау министры Эльмира Зарипова, Архив эшләре буенча дәүләт комитеты рәисе Ирада Әюпова һәм башка рәсми затлар озатып йөри.

Искәртеп үтик, Россия дәүләт тарихы архивы (РГИА) – дөньядага иң зур архивларның берсе. Бүгенге көндә анда Россия империясе тарихы буенча 6,5 млн документ саклана. Ә гомуми архив фондында 7 млн берәмлектән артык документ тупланган. Коллекциядә күренекле Россия дәүләт һәм җәмәгать эшлеклеләренең шәхси фондлары, сирәк басма һәм кулъязмалар бар. Уникаль документлар арасында Петр I шәрехләвендә рус әлифбасы проектын һәм 1861 елгы крепостной хокуктан азат итә торган Манифестны күрергә була.

#Рөстәм Миңнеханов #Санкт-Петербург

Сәхифәләр

Рөстәм Миңнеханов: Татарстан Россия дәүләт тарихы архивы белән хезмәттәшлекне үстерә