Рөстәм Миңнеханов росгвардиячеләргә яңа автомобиль ачкычларын тапшырды
Тантанадан соң Татарстан Президентына «УАЗ Патриот» яңа машинасында йөреп карарга тәкъдим иттеләр.
(Казан, 23 март, «Татар-информ», Елена Сәлахова). Бүген Татарстан Республикасы Президенты Рөстәм Миңнеханов Росгвардиянең Татарстан Республикасы буенча идарәсе хезмәткәрләренә 40 яңа машина ачкычы тапшырды. «Лада Веста» һәм «УАЗ Патриот» җиңел машиналары Милли гвардия гаскәрләре көне алдыннан республика бюджеты хисабына сатып алынды.
«Без Росгвардиянең Татарстан идарәсенә оператив хезмәт эшчәнлеге өчен яңа автотранспорт чаралары бирү мөмкинлеген булдырдык. Ведомство хезмәткәрләре хәл итә торган бурычлар бик мөһим. Росгвардиягә һәрвакыт ярдәм итәчәкбез. Яңа машиналар тагын да оперативрак карарлар кабул итү мөмкинлеген бирер дип өметләнәбез», — диде Миңнеханов.
Автомобильләрнең күбесен ведомстводан тыш сак бүлекчәләре тоткарлау төркемнәрен йөртүчеләр алды, калганнары лицензия-рөхсәт эшләре үзәге һәм Татарстан Росгвардия идарәсенең башка бүлекчәләре хезмәткәрләренә тапшырылды.
Яңа машиналар махсус ут һәм тавыш сигналлары булган барлык кирәкле җиһазлар белән җиһазландырылган, бу ведомство хезмәткәрләренең эшен яхшыртырга мөмкинлек бирәчәк.
Россия Федерациясе Милли гвардия гаскәрләренең Идел буе округы командующие генерал-полковник Александр Порядин Рөстәм Миңнехановка росгвардиячеләргә республика Хөкүмәте ярдәме өчен рәхмәт белдерде.
«Россия Федерациясенең һәр субъекты да безнең хәрби хезмәткәрләр һәм милли гвардия гаскәрләре хезмәткәрләре өчен сез башкарган эшләрне башкара алмый. Мин сезгә чын күңелдән рәхмәт белдерәм. Без исә, үз чиратыбызда, республикада куелган бурычларны үтәүдә ярдәм итәчәкбез», — диде Порядин.
Галерея: Минниханов вручил росгвардейцам ключи от новых служебных автомобилей