Рөстәм Миңнеханов мигрантларны урнаштыру үзәге төзү мәсьәләсен хәл итәргә вәгъдә бирде
Бу мөрәҗәгать белән коллегия утырышында министр Артем Хохорин чыкты.
(Казан, 25 гыйнвар, “Татар-информ”, Гөлнар Гарифуллина). Татарстанга чит дәүләтләрдән килгән кешеләрне вакытлыча урнаштыру өчен яңа үзәк кирәк. Хәзер гамәлдә булганы кирәк кадәр сыйдыра алмый һәм тиешле таләпләргә җавап бирми. Бу хакта бүген Татарстан буенча Эчке эшләр министрлыгының коллегия утырышында министр Артем Хохорин белдерде.
“Тиздән халыкара вакыйгалар узачагын күздә тотып та, хәзерге үзәк тиешле таләпләргә җавап бирми, өстәвенә бар кешене сыйдыра да алмый. Аның үткәрүчәнлек сәләте нормадан ике мәртәбә түбән. Чит илдән килүчеләрне вакытлыча тоту үзәген төзү мәсьәләсе инде берничә ел рәттән күтәрелә, әмма хәл ителми”, - диде министр. Ул быел февраль аенда бу мәсьәлә буенча Россия Президенты Аппаратыннан вәкилләр киләчәген хәбәр итеп, бу мәсьәләне хәл итүдә Рөстәм Миңнехановка ярдәм сорап мөрәҗәгать итте.
Татарстан Президенты үзенең чыгышында мигрантларны вакытлыча тоту учреждениесен булдыру бурычын быел хәл итәргә вәгъдә бирде.