Җәмгыять 29 июнь 2018 11:08

Рөстәм Миңнеханов мәгариф оешмаларын сыйфатлы итеп төзекләндерергә чакырды

Татарстанда пландагы 16 муниципаль мәктәпнең 4есе төзекләндерелгән, калганнарында ремонт эшләре дәвам итә.

Скопировать ссылку

(Казан, 29 июнь, «Татар-информ»). Бүген Татарстан Президенты Рөстәм Миңнеханов ТР Хөкүмәте йортында узган традицион республика киңәшмәсендә белем бирү объектларын капиталь төзекләндерүдә сыйфатка зур игътибар бирергә чакырды. Бу хакта республика башлыгының матбугат хезмәте хәбәр итә.

Киңәшмәдә ТР төзелеш, архитектура һәм ТКХ министры Ирек Фәйзуллин белдергәнчә, хәзерге вакытта республикада планлаштырылган 16 муниципаль мәктәпнең – 12сендә (дүртесе төзекләндерелгән инде), 12 коррекция мәктәбендә, шулай ук планлаштырылган 94 балалар бакчасының 89ында капиталь ремонт эшләре бара.

Моннан тыш, 11 ресурс үзәге (көллият) төзекләндерелә. Аларга тотылган чыгымнарның гомуми күләме 681 миллион сумнан да артып китә. Программага кертелгән 14 балалар сәламәтләндерү лагерының барысында да ремонт эшләре төгәлләнгән, диде Ирек Фәйзуллин.

Амбулатор-поликлиника учреждениеләре биналарын төзекләндерүгә килгәндә, 114 объектның 99ында эш дәвам итә. Быел поликлиникаларны капиталь ремонтлауга 3 миллиард 196 миллион сумга якын акча сарыф ителәчәк, диде министр.

#капиталь төзекләндерү #мәгариф оешмалары

Сәхифәләр

Рөстәм Миңнеханов мәгариф оешмаларын сыйфатлы итеп төзекләндерергә чакырды