Рөстәм Миңнеханов һәм Фәрит Габделганиев Wildberries логоүзәгенә нигез салды
Онлайн-ритейлерның логоүзәгендә 4 меңнән артык яңа эш урыны булдырылачак, дип искәрттеләр компаниядә.
(Казан, 11 ноябрь, «Татар-информ»). Татарстан Президенты Рөстәм Миңнеханов һәм ТР икътисад министры Фәрит Габделганиев Wildberries онлайн-ритейлерының яңа логоүзәгенә нигез салу тантанасында катнашты. Инде киләсе елда ук республикада әлеге проектны гамәлгә ашыру нәтиҗәсендә 4 меңнән артык яңа эш урыны булдырылачак. Бу хакта компаниянең матбугат хезмәтеннән хәбәр иттеләр.
Рөстәм Миңнеханов сүзләренчә, киң колачлы проект республика өчен стратегик әһәмияткә ия.
«Яңа логоүзәк Татарстанда онлайн-коммерцияне үстерергә, ә җирле товар җитештерүчеләргә үз продукциясен Россиянең бөтен төбәкләрендә сатарга мөмкинлек бирәчәк», - дип искәртте Миңнеханов һәм компания вәкилләренә төбәк территориясендә инфраструктураны үстергәннәре өчен рәхмәт белдерде.
Wildberries логоүзәге Яшел Үзән өстенлекле социаль-икътисади үсеш территориясе мәйданчыгында урнашачак. Онлайн-ритейлер вәкилләре белдергәнчә, комплекс 100 мең квадрат метрга якын мәйданны биләячәк. Аның беренче чиратын киләсе елның беренче яртыеллыгында файдалануга тапшыру күздә тотыла, проектка кертелгән инвестицияләрнең күләме 5,5 миллиард сум тәшкил итә.
