Рөстәм Миңнеханов: Хатын-кыз - милләтне яшәтүче, саклаучы, үстерүче
Президент парламентка Юлламасында гаиләнең әһәмиятен дә билгеләп узды.
(Казан, 25 сентябрь, "Татар-информ", Гөлнар Гарифуллина). Хатын-кыз һәр ир-ат өчен ярдәм, гаиләнең якты чыганагы, милләтне яшәтүче, саклаучы, үстерүче. Татарстан Президенты Рөстәм Миңнеханов VI чакырылыш ТР Дәүләт Советына Юлламасында шулай дип белдерде.
"Туган телебезне юкка гына ана теле дип әйтмиләр. Без барыбыз да бишек җырларын тыңлап үскән. Бу һәрчак шулай булсын", - диде. Ул хатын-кызның һөнәри эшчәнлек, бала тәрбиясе, өй хуҗалыгы белән шөгыльләнүен, аңа зур җаваплылык йөкләнгәнен билгеләп узды.
"Гаилә бөтен кешелек өчен рухи кыйммәтләрне тәрбияли, баланы шәхес итеп тәрбияли. Әлеге традицияләрне буыннан-буынга тапшыру мөһим. Нык һәм тату гаилә илебезнең горурлыгы, ышанычлы таянычы, якты киләчәге", - дип әйтте Рөстәм Миңнеханов.