Рөстәм Миңнеханов хәләл продукция экспортының мөмкинлекләре зур дип саный
«Без потенциалны максималь ачарга тиеш», — диде Президент.
(Казан, 12 февраль, «Татар-информ», Гөлнар Гарифуллина). Татарстан Президенты Рөстәм Миңнеханов фикеренчә, хәләл продукция экспортының мөмкинлекләре зур. Бу хакта ул Авыл хуҗалыгы һәм азык-төлек министрлыгының коллегия утырышында әйтте.
Президент илкүләм проект гамәлгә ашырылганын искәртте.
«Экспорт буенча әлегә план күрсәткечләренә чыкмадык. Бүген экспортның бөтен мөмкинлекләрен карарга кирәк. Минемчә, хәләл продукция резервы зур, — дип әйтте Рөстәм Миңнеханов.
Ул республиканың Ислам хезмәттәшлеге оешмасы илләре белән мөнәсәбәтләре яхшы булуын искәртте. «Булган коралларны кулланырга кирәк. Казансаммит уздырыла, җәен үтәчәк. Без потенциалны максималь ачарга тиеш», — диде Президент.