Рөстәм Миңнеханов галстукка караганда милли киемнең уңайлырак булуын әйтте
Татарстан Президенты ТАССРның 100 еллыгына кигән киеме турында фикерен җиткерде.
(Казан, 24 декабрь, «Татар-информ», Рәмис Латыйпов). Татарстан Президенты журналистлар белән Яңа ел алды очрашуында ТАССРның 100 еллыгына кигән милли киеме турындагы сорауга җавап бирде.
«Без үзебезнең милләтебезне, гореф-гадәтләребезне, ризыкларыбызны, динебезне сакларга тиеш. Ашаудан, диннән, җыр-биюдән башка безнең милли киемнәребез дә бар. Нигә аны артистлар гына кияргә тиеш. Ул үзебезнең киемебез булган», — диде ТР Президенты.
«Әлеге милли стильдә тегелгән костюм, галстук белән йөргәнгә караганда, бик уңайлы һәм бик матур. Элеккеге фотоларда безнең бөтен күренекле шәхесләребез, язучыларыбыз шул киемдә булган», - диде Рөстәм Миңнеханов.
«Аны бер кеше дә көчләп кидертми. Без, беренче чиратта, андый киемнәрне Әсгать Әхмәтович (Сафаров - ТИ иск.) һәм Илсур Рәисович (Метшин - ТИ иск.) белән киябез. Ул бик матур була, сезгә дә бик килешер иде андый киемнәр», — диде Рөстәм Миңнеханов.