Рөстәм Миңнеханов француз эшкуарларын Татарстан белән хезмәттәшлек итәргә чакырды
Республика Франция компанияләренең Россиядә эшләве өчен старт мәйданчыгы була ала, дип искәртте ТР Президенты.
(Казан, 22 март, «Татар-информ»). Татарстан француз бизнесын һәм капиталын җәлеп итүгә карата кызыксыну белдерә. ТР Президенты Марсель шәһәрендә «Франция – Татарстан» бизнес-форумында шулай дип белдерде. Бу хакта ТР Президентының матбугат хезмәте хәбәр итә.
«Сезнең төбәк эшкуарларын Татарстан белән хезмәттәшлек итәргә чакырабыз», - диде Миңнеханов эшлекле форумда катнашучыларга мөрәҗәгать итеп.
Татарстан лидеры искәрткәнчә, республикада ике якка да файдалы элемтәләрне киңәйтүгә шат булачаклар һәм француз компанияләренә һәртөрле ярдәм күрсәтергә әзер торалар. Татарстан шулай ук мәдәният, фән, мәгариф һәм туризм өлкәләрендә дә Франция белән хезмәттәшлекне үстерергә ниятли.
«Без француз компанияләренең Россиядә эшләү өчен республикабызны старт мәйданчыгы сыйфатында сайлавына карата кызыксыну белдерәбез», - диде ул.
Татарстанда, аерым алганда, Франциянең «Шнейдер Электрик», «Эр Ликид» һәм «Сен-Гобен» кебек компанияләре уңышлы гына эшли, дип искәртте ТР Президенты.
