Рөстәм Миңнеханов Эшкуарлык советының үзмәшгульлеккә багышланган утырышын үткәрәчәк
Хәзерге вакытта республикада 4,1 меңнән артык үзмәшгуль граждан теркәлгән.
(Казан, 11 март, «Татар-информ»). Татарстан Президенты Рөстәм Миңнеханов бүген Эшкуарлык советының киңәйтелгән утырышын үткәрәчәк. Утырышта үзмәшгульләр өчен мөмкинлекләр булдыру, эшкуарлык инициативасын стимуллаштыру кебек темалар күтәреләчәк. Бу хакта Татарстан бизнес-омбудсменының матбугат хезмәте хәбәр итә.
«Утырыш кысаларында кондитерлар өчен санитар нормалар, чит ил гражданнарын үзмәшгульләр сыйфатында теркәү, үзмәшгульләрнең дәүләт сатуларында катнашуы һ.б. темалар кузгатылачак», - диелә матбугат хезмәте хәбәрендә
Утырыш «Пирамида» мәдәни-күңел ачу комплексында ирекле дискуссияләр форматында узачак. Татарстанның бизнес-омбудсмены Тимур Нагуманов чараның модераторы булыр дип көтелә.
Татарстан 2019 елда үзмәшгуль гражданнар өчен яңа салым режимы кертү буенча сынау проектында катнаша. Бүген республикада 4,1 меңнән артык үзмәшгуль граждан теркәлгән.