Рөстәм Миңнеханов епархияләргә автомобиль ачкычлары тапшырды
Татарстан Президенты Казан епархия идарәсендә республика митрополиясе архиерейлары белән очрашты.
(Казан, 10 гыйнвар, «Татар-информ»). Казан епархия идарәсендә бүген Татарстан Президенты Рөстәм Миңнеханов Татарстан митрополиясе архиерейлары белән очрашты. Республика лидеры дин вәкилләрен Раштуа белән котлады һәм епархияләргә автомобиль ачкычлары тапшырды.
«Лада Ларгус» җиңел автомобильләре епархияләр карамагындагы хәйрия оешмалары кирәк-яраклары өчен каралган, дип хәбәр итә ТР Президенты матбугат хезмәте.
Рөстәм Миңнеханов Рус православие чиркәве вәкилләренә төбәктә үзара аңлашу, килешү һәм тынычлык өчен рәхмәт белдерде.
Татарстан территориясендә 2019 дини объект, шул исәптән 1440 мәчет һәм 521 православие чиркәве эшли. Барлыгы 1862 дини оешма теркәлгән.
