Рөстәм Миңнеханов Дмитрий Медведев җитәкчелегендә узачак киңәшмәдә катнаша
Киңәшмәдә Россиядә капитал салуларны яклау һәм хуплау турындагы закон проекты хакында фикер алышачаклар.
(Казан, 26 февраль, «Татар-информ», Алексей Угаров). Бүген ТР Президенты Рөстәм Миңнеханов РФ Премьер-министры Дмитрий Медведев җитәкчелегендә узачак Россиядә капитал салуларны яклау һәм хуплау турындагы закон проектын тикшерүгә багышланган киңәшмәдә катнаша. Казан Кремленең рәсми вәкиле Лилия Галимова «Татар-информ» агентлыгына шул хакта хәбәр итте.
«ТР Президенты Рөстәм Миңнеханов закон проекты хакында фикер алышуда катнашучылар арасына керде, чөнки Татарстан – бизнес белән эш нәтиҗәле алып барыла торган төбәкләрнең берсе. Әлеге документ инвесторларга проектны гамәлгә ашыру чорында тотрыклы салым шартлары гарантияли. Бу закон проектында башта ук телгә алынган төп пунктларның берсе», - диде Галимова.
Мондый закон проектын кабул итү кирәклеге турындагы мәсьәлә 2018 елның 5 октябрендә Казанда беренче вице-премьер Антон Силуанов һәм Россиянең кайбер төбәк башлыклары катнашындагы киңәшмәдә күтәрелгән иде.
«Безнең мәйданчыкта закон проекты буенча беренчел фикер алышулар үткәрелде инде. Шунлыктан киңәшмәдә катнашучылар арасында Татарстан Президенты да бар», - дип билгеләп үтте Казан Кремленең рәсми вәкиле.