Рөстәм Миңнеханов АКШта инвестицияләр җәлеп итү буенча конференциядә катнашачак
Конференция 14 майда Хьюстон шәһәрендә (Техас штаты) узачак.
(Казан, 13 март, «Татар-информ»). Татарстан Президенты Рөстәм Миңнеханов май аенда Америка Кушма Штатларына барырга ниятли. Бу хакта ТАСС Хьюстонда (Техас штаты) Россиянең Генераль консулы Александр Писаревка сылтама белән хәбәр итә.
«Май аенда Миңнехановның эш сәфәре планлаштырыла», – дип белдерде дипломат.
Хьюстонда Америка-Россия сәүдә палатасы сайтында урнаштырылган хәбәр нигезендә, Татарстан Президенты Россия төбәкләренә инвестицияләр җәлеп итүгә багышланган конференциядә катнашачак.
Конференция 14 майда Хьюстон үзәгендәге кунакханәдә узачак. Рөстәм Миңнеханов белән бергә АКШка бизнес-делегация киләчәк. Анда катнашучылар, сәүдә палатасы билгеләп үткәнчә, эшлекле даирә вәкилләре белән очраша алачак.