Рәис Миңнеханов мөслимәләрне бала табарга пропагандаларга өндәде
Татарстанның Саба районы башлыгы туучылар санының аз булуы райондагы төп проблемаларның берсе диде.
(Казан, 21 февраль, «Татар-информ»). Татарстан Республикасы Саба районы башлыгы Рәис Миңнеханов район Советы утырышында мөслимәләрне балалар табарга пропагандаларга өндәде.
Бүген сессиядә Саба районының 2017 елда социаль-икътисади үсешенә нәтиҗә ясадылар. Район Советы утырышында Татарстан Дәүләт Советы Рәисе Фәрит Мөхәммәтшин катнашты. Бу хакта республика парламенты матбугат хезмәте хәбәр итә.
Татарстан Саба районы башлыгы туучылар саны республиканың күпчелек районнарындагы кебек райондагы төп проблемаларның берсе дип атады. Соңгы биш елда туучылар саны 103 балага кимегән. Район башлыгы авыл җирлекләрендә беренче һәм өченче балалар туган очракта, айлык түләүләр кертелү, бу вазгыятьне үзгәртү мөмкинлеге бирәчәк дип өметләнүен белдерде.
“Туучылар санын арттыру буенча мөслимәләрне, абыстайларны һәм медицина учреждениесе хезмәткәрләрен бала табарга сәләтле хатын-кызлар арасында бала табуны пропагандаларга өндим”, - диде Миңнеханов.
Район башлыгы Рәис Миңнеханов кече һәм урта бизнес үсеше территориянең икътисади үсү факторы булып тора диде. Бүгенгә районның югары сәнәгать технологияләренең гомуми күләмендә аларның өлеше 33 процент тәшкил итә. “Районны үстерү стратегиясе кысаларында бу күрсәткечне 50 процентка кадәр арттыру бурычын куябыз”, - диде ул.
Район башлыгы Байлар Сабасында яңа мәктәп төзелеше мәсьәләсен дә кузгатты. Хәзерге мәктәптә балалар саны нормадан артып киткән.
Шулай ук авыл туризмын үстерү концепциясен эшләргә кирәклеген дә билгеләп үтте ул.
Рәис Миңнеханов докладында, Россия Президенты тарафыннан бу ел Волонтерлар елы дип аталуын искәртте, районда яшәүчеләр арасында хәрәкәтне үстерү зарурлыгын белдерде.