Җәмгыять 26 декабрь 2019 15:58

Путин Мәхмүт Гәрәевне чын патриот дип атады

Дәүләт башлыгы Бөек Ватан сугышы ветераны вафатына бәйле рәвештә кайгы уртаклашу белдерде.

Скопировать ссылку

(Казан, 26 декабрь, «Татар-информ»). Россия Президенты Владимир Путин Бөек Ватан сугышы ветераны Мәхмүт Гәрәев вафатына бәйле рәвештә кайгы уртаклашу сүзләрен белдерде. Ветеран балалары Тимур Гәрәевка һәм Галия Крайновага адресланган телеграмма Кремль сайтында басылып чыкты.

«Армия генералы Мәхмүт Гәрәев җиңүчеләрнең танылган буын вәкиле, ихтыярлы, энергияле кеше һәм чын патриот булды», - диде дәүләт башлыгы.

Ул Мәхмүт Әхмәт улы «Бөек Ватан сугышының фронт юлларын батырларча узды», аннан соң үзен Россия Федерациясе Кораллы көчләрен үстерүгә, илнең оборона сәләтен һәм милли иминлеген ныгытуга багышлады, дип билгеләп үтте.

«Мәхмүт Әхмәт улы үзенең хезмәт бурычын намус белән үтәде, хезмәттәшләре һәм кул астындагылар өчен үрнәк булды һәм соңгы көнгә кадәр әһәмиятле иҗтимагый эшчәнлектә, ветераннар хәрәкәтендә актив катнашты», — диде Владимир Путин. Ул аның үз эшенә бирелгәнлеге, белеме, тәҗрибәсе һәм тугрылыгы һәрвакыт эшчәнлегенең төрле юнәлешләрендә бик кирәк булганлыгын әйтте.

25 декабрьдә Совет һәм Россия хәрби җитәкчесе, Хәрби фәннәр академиясе президенты, хәрби һәм тарих фәннәре докторы, отставкадагы армия генералы Мәхмүт Гәрәев 97нче яшендә вафат булды.

#Владимир Путин #Мәхмүт Гәрәев

Сәхифәләр

Путин Мәхмүт Гәрәевне чын патриот дип атады