Психолог: Ялгыз хатын-кыз балага әтисен алыштырырга тиеш түгел
«Хатын-кыз әни һәм әти вазифаларын башкарса, ул әлеге ике функцияне тулаем үти алмый», - ди гаилә психологы Һава Шәйдуллина.
Психолог, дини белемле сексолог Һава Шәйдуллина улын яки кызын ялгыз тәрбияләүче әни кеше баласына әтисен алыштырырга тиеш түгел дип саный.
«Хатын-кыз әтине алыштырырга тиеш түгел, ике рольне дә башкарырга ярамый. Хатын-кыз гел хатын-кыз булып калырга, фәкать үзенең әни функциясен үтәргә тиеш. Ул әти дә, әни дә ролен уйнаса, ике функцияне дә тулаем башкара алмый», - диде ул «Гадел әңгәмә» тапшыруының яңа чыгарылышында.
Психолог фикеренчә, бала әтисе белән күрешеп торырга тиеш. Әгәр әти кеше булмаса, баланы тәрбияләүдә башка ир-ат катнашса кулайрак. «Әгәр дә ир баланың әтисе юк икән, ул ниндидер тренер, я булмаса, укытучы, абыйсы, бабасы белән аралашып үсәргә тиеш, ниндидер фигура булса яхшырак», - диде ул.
- Психолог-сексолог Һава Шәйдуллина белән «Гадел әңгәмә» тапшыруын «Татар-информ»ның Ютуб-каналында карый аласыз.