Сәхифәләр
«Татар-информ» мәгълүмат агентлыгы баш редакторы
Ринат Вагыйз улы Билалов
420066, Татарстан Республикасы, Казан, Декабристлар ур., 2нче йорт.
«ТАТМЕДИА» акционерлык җәмгыяте
«Татар-информ» мәгълүмат агентлыгы татар редакциясе
Баш редактор урынбасары
Зилә Мөбәрәкшина
«Мәктәп укучылары өчен мәдәният» проекты Владимир Даль мирасы турында акция үткәрә
2026 елның 22 маеннан 30 июненә кадәр «Мәктәп укучылары өчен мәдәният» ведомствоара мәдәни-белем бирү проекты кысаларында «Владимир Дальның бөек мирасы» Бөтенроссия акциясе узачак. Ул рус язучысы һәм этнографының тууына 225 ел тулуга багышланган.
Россия мәдәният министры урынбасары Жанна Алексеева билгеләп үткәнчә, Владимир Даль рус телен аралашу чарасы буларак кына түгел, ә халыкның тере хәтере буларак та күрсәтә алган. Аның сүзләренчә, әдип сүзлек төзеп кенә калмаган, ә анда 200 меңгә якын сүз һәм 30 мең мәкальдән торган тел байлыгын туплаган.
Ул шулай ук бу мирасны саклап калу һәм үсеп килүче буында аңа карата кызыксыну уяту әлеге проектның бурычларыннан берсе булуын искәртте. Алексеева фикеренчә, акциядә катнашу укучыларга үзләрен күренекле язучы һәм этнограф эшен дәвам итүчеләр итеп тоярга мөмкинлек бирәчәк.
Россиянең төрле төбәкләрендәге мәктәп укучылары иҗади ярышларда катнаша һәм үзләрен берничә номинациядә күрсәтә алачак.
«Диалект сүзләре» номинациясендә катнашучыларга, Владимир Даль сүзлегендәге диалектизмнарны кулланып, үз тормышларындагы берәр очрак турында видеоролик яздыру бурычы тора.
«Остаз белән рольләр буенча уку» номинациясе Даль әкиятләренең берсен укытучы, китапханәче яки башка остаз белән бергә укуны күздә тота.
«Гаилә рольләре буенча уку» категориясендә укучыларга әти-әниләре яки туганнары белән язучының әкиятен укырга тәкъдим итәләр.
«Башваткыч» номинациясендә катнашучылар ребус, шарада яки Даль сүзлегендә басылган рус халык мәкальләре һәм әйтемнәре белән бәйле башка интеллектуаль мәсьәлә уйлап таба алачак.
Тагын бер юнәлеш – «Даль әкиятләре дөньясы», анда укучыларга автор әсәрләре буенча театраль тамаша әзерләргә туры киләчәк.
Проектта катнашу өчен бер яки берничә номинациядә эш әзерләргә һәм 2026 елның 22 маеннан 30 июненә кадәр «Культурадляшкольников.РФ» порталында гариза бирергә кирәк.
Акция нәтиҗәләре буенча экспертлар иң яхшы 100 эшне сайлап алачак. Алар проект сайтында урнаштырылачак, ә конкурс нәтиҗәләре 2026 елның 4 августында «Яңалыклар» бүлегендә билгеле булачак.
Кызыклы яңалыкларны күзәтеп бару өчен Телеграм-каналга язылыгыз