Хәсән Туфан нинди кара белән генә язган? — «Безнең мирас»

Хәсән Туфан Пермь шәһәреннән яшел кара кайтарта.

(Казан, 21 июнь, «Татар-информ», «Безнең мирас»). Хәсән Туфан яшел карадан башка кара белән һич язмаган, диләр.

— Нихәлләрдә, Хәсән абый! — дип сораганнар Туфаннан.

— Язып булмый әле бу арада, — дигән шагыйрь.

— Авырыйсыңмы әллә?

— Юк, авырмыйм, — ди Туфан. — Карам бетте.

— Кибеттә кара күп бит, Хәсән абый! — дигәннәр аңа.

— Кибеттә зәңгәр дә кара төстәге кара гына, миңа яшел төслесе кирәк! — дигән остаз.

Гөнаһ шомлыгына күрә, ул айда кибетләргә яшел кара чыкмаган була. Хәсән Туфан Пермь шәһәреннән яшел кара кайтарта.

 

(Сибгат Хәким авызыннан. 1983, 14 ноябрь)