Сарапул татарлары автономиясе җитәкчесе йөз кешегә «Яңарыш»ка язылу бүләк иткән
ХӘзер газета Уральский, Сигаево, Дулесово авылларында яшәүче өлкәннәргә киләчәк.
(Казан, 15 февраль, «Татар-информ»). Удмуртиянең «Яңарыш» сайтында Нәзлия Лотфуллинаның «Бер игелек — йөз куаныч» дигән язмасы чыкты.
Эшең, гамәлең белән башка берәүнең күңелен үсендерү, ярдәм кулы сузу — кешелеклелек, мәрхәмәтлелек билгесе. Ә яхшылык эшләүнең, игелек кылуның юллары чиксез күп.
Бәяләр даими үскән вакытта «Яңарыш» газетасына язылу бәясе дә арта. Кемнәргәдер бу бәядән газета-журналларга язылу авыр. Бигрәк тә өлкән буын үзебезнең бердәнбер газетабыздан башка яшәргә күнекмәгән, алар атна саен «Яңарыш» ны түземсезләнеп көтеп ала. Быел эшмәкәр, Сарапул районы татарларының милли-мәдәни автономиясе җитәкчесе Фелүн Мөхәммәткул улы Шәйхелисламов шуны истә тотып, 100 газетаны яздырып, Уральский, Сигаево, Дулесово авылларында яшәүче өлкән яшьтәге милләттәшләребезгә бүләк итте. Хәер, ул Сарапул районы депутатлар Советы булганда да бу изге эше белән милләттәшләрне сөендерә иде.
«Яңарыш» газетасы аша республикабыздагы милли тормыш белән танышып барабыз, динебезне, йолаларыбызны өйрәнәбез, балаларыбызга газета аша телебезне өйрәтәбез. Үзем газетаны беренче көненнән үк язылып, укып барам. Яраткан язмаларны кисеп алып саклыйм, еллар узгач, кабат алып укыйм.
Минемчә, әгәр син үз милләтеңне, республикаңны яратасың, аның тормышын, мәдәниятен, рухи кыйбласын беләсең килә икән, «Яңарыш» бу яктан иң якын ярдәмчең, дустың була ала. Аның хәзер эчтәлеге генә түгел, бизәлеше, эшләнеше дә үзгәрде, заманча, зәвыклы, кулга алуы ук күңелле. Төсле битләр ямь биреп тора. Газетаны рәхәтләнеп укыйбыз, фикер алышабыз, мәчеткә җыелгач, сорауларыбызга җавап табабыз.
Фелүн Мөхәммәткул улына җаваплы хезмәтендә яңа үрләр, зур уңышлар юлдаш булсын, озын гомер телибез.
Чиксез рәхмәт хисләре белән, Уральский поселогында яшәүчеләр исеменнән.