news_header_top_970_100
16+
news_header_bot_970_100

Казанның Авиатөзелеш һәм Яңа Савин районнары администрациясенә яңа җитәкче билгеләнде

Илсур Метшин районнар командасы алдында торган бурычларны билгеләде.

(Казан, 19 май, «Татар-информ», Екатерина Андреева). Казанның Авиатөзелеш һәм Яңа Савин районнары администрациясенең яңа башлыгы итеп шәһәр зооботсадасының элеккеге директоры Фәнис Нурмөхәммәтов билгеләнде. Бүген яңа җитәкчене коллективка Татарстан башкаласы мэры Илсур Метшин тәкъдим итте.

Илсур Метшин районнар командасы алдында торган бурычларны билгеләде. Сүз Авиатөзелеш районының киләчәктәге үсеше турында бара — халыкны җәлеп итү урыннары булдыру, ташландык сәнәгать зоналарын яңадан форматлаштыру, яңа мәгариф учреждениеләре төзү, район бистәләрен үстерү. Бу хакта Казан мэриясе матбугат хезмәте хәбәр итә.

Мэр кушуы буенча Яңа Савин районында агач утырту, җәяүлеләр һәм велосипед юллары булдыру, уңайлы мохит булдыру, район буйлап яшеллек булдыру эше дәвам итәчәк.

Элегрәк, 23 апрельдә, Нурмөхәммәтов муниципаль хезмәткә күчү сәбәпле, Татарстан Дәүләт Советы депутаты вәкаләтләреннән баш тартты. Ул Казанның Авиатөзелеш һәм Яңа Савин районнары администрациясе башлыгы урынбасары итеп билгеләнде.

Районнар администрациясенең элеккеге башлыгы Тимур Алибаев 12 майдан А. Н. Туполев исемендәге Казан илкүләм тикшеренү техник университеты — КАИ ректоры вазифаларын башкаручы итеп билгеләнде. Алибаев районнар администрациясе башлыгы вазифасын ун елдан артык биләгән.

autoscroll_news_right_240_400_1
autoscroll_news_right_240_400_2
news_bot_970_100