Юрий Камалтынов: Татарстанлыларның сайлау участокларына актив баруы сөендерә
Журналистларга сайлаулар көнендә Миңнехановның иҗтимагый штабы эше турында сөйләделәр.
(Казан, 13 сентябрь, «Татар-информ»). Татарстанлылар республикада уза торган сайлауларда югары сайлау активлыгын күрсәтә. Журналистларга мондый фикерне Татарстан Президентына кандидат Рөстәм Миңнехановның иҗтимагый сайлау штабы җитәкчесе Юрий Камалтынов белдерде.
«Беренче ике көндә республика сайлаучыларының яртысы диярлек сайлау участокларында үз тавышларын биргән булуы сөендерә», — диде Юрий Камалтынов.
Штабта тавыш бирүнең төп көне тәмамлануын дулкынланып көтәләр, диде ул.
Тавыш бирү вакытында хокук бозу очраклары әлегә юк, диде Камалтынов.
«Безгә штабка ниндидер җитди хокук бозу турында хәбәр килмәде. Һәр сайлау участогында булган күзәтүчеләрдән борчулы хәбәрләр булмады. Бу яктан, барысы да яхшы бара», — диде Камалтынов.
Аның сүзләренчә, республика участокларында барлыгы 3 меңгә якын күзәтүче эшли, алар штаб хезмәткәрләре белән даими элемтәдә тора. Соңыннан агентлык әңгәмәдәше штабта агымдагы эш турында сөйләде. Аның сүзләренчә, хәзер төп бурыч — бөтен Татарстан буенча күзәтүчеләр белән элемтәдә тору.