Дума архивлар белән дөрес эшләмәгән өчен штрафларны 10 тапкыр арттыру идеясен хуплады
Элегрәк Татарстан Дәүләт Советы административ кодекска архив документларын саклау, комплектлау, исәпкә алу һәм куллану кагыйдәләрен бозуга кагылышлы төзәтмәләр кертергә тәкъдим иткән иде.
(Казан, 9 июль, «Татар-информ», Динара Прокопьева). Дәүләт Думасы беренче укылышта архив документларын дөрес итеп сакламаган, исәпкә алмаган яки кулланмаган өчен штрафларны 10 тапкыр арттырырга тәкъдим иткән закон проектын хуплады. Бу хакта «Татар-информ» мәгълүмат агентлыгы корреспондентына Татарстан парламенты депутаты Илдар Гыйльметдинов хәбәр итте.
«Бу системага әверелде. Күп кенә предприятиеләр, оешмалар, кызганыч, үз архив материалларын тапшырмый, яки аларны ташлый, яисә аларга тиешле игътибар күрсәтелми. Аннары, кешеләр дәүләт архивыннан әлеге оешмаларда эшләүләре турында белешмә сораганда, документларны таба алмыйлар», - дип аңлатты Гыйльметдинов.
Әлегә архивларга кагылышлы хокук бозулар өчен гражданнарга — 100 сумнан 300 сумга кадәр, вазифаи затларга 300 сумнан 500 сумга кадәр штрафлар гамәлдә. Закон проекты белән әлеге сумманы 10 тапкыр арттырырга һәм юридик затлар өчен 5 меңнән 10 мең сумга кадәр штраф рәвешендә административ җаваплылык кертергә тәкъдим ителә.
Документ Дәүләт Думасында беренче укылышта узды, икенче укылыш көзге сессиядә узачак. Шулай ук ТР Дәүләт Советы тарафыннан тәкъдим ителгән тагын бер закон проекты хупланды — ул үзара салым механизмын киңәйтү турында.