Дин 24 февраль 2009 11:36

Петербург мәчетендә вайнахларны депортацияләү көне билгеләнде

Моннан 65 ел элек ярты миллионга якын чечен һәм ингушны иленнән кудылар

Скопировать ссылку

(Санкт-Петербург, 24 февраль, “Татар-информ”, Зәрия Хәсәнова). Кичә Санкт-Петербургның Җәмигъ мәчетендә вайнахларны депортацияләү көне билгеләнде. Моннан нәкъ 65 ел элек НКВД, НКГБ һәм СМЕРШның җыелма роталарыннан торган солдат һәм офицерлар чечен һәм ингушларны Кыргызстан һәм Казахстанның төньяк өлкәләренә көчләп озаткан. Бу вәхшилеккә Лаврентий Берия үзе җитәкчелек итә. 14 яшьтән өлкән иръегетләрне, янәсе, Кызыл Армия көненә багышланган митингка җыялар. Аннары автомат төзегән килеш машиналарга утырырга мәҗбүр итәләр. Хатын-кызлар һәм балаларны тимер юл станцияләренә куалар. Өйдә калганнарны җәзалап үтерәләр. Тарихи мәгълүматларга караганда, 1944 елның 27 февралендә Хайбах авылыннан 750 чеченны колхоз ат сараенда яндыралар. Көчләп куылганнарның байтагы юлда ачлыктан, суыктан һәлак була.
Төньяк башкаланың Җәмигъ мәчетенә ул фаҗигале көннәрне искә алырга төрле милләт вәкилләре - ике йөзләп кеше килгән иде. Җыелучылар бергәләп намаз укыды, кечкенә митинг оештырды. Соңыннан садака таратылды.

Сәхифәләр

Петербург мәчетендә вайнахларны депортацияләү көне билгеләнде