Песошин: Татарстан хокук саклау органнары хезмәткәрләренә ярдәм итүгә аерым игътибар бирә

Татарстан Премьер-министры Алексей Песошин бүген Россия Эчке эшләр министрлыгы территориаль органнарының шәхси иминлек бүлекчәләре җитәкчеләренең бөтенроссия семинар-киңәшмәсендә катнашты. Бу хакта ТР Хөкүмәте матбугат хезмәте хәбәр итә.

Эчке эшләр министрлыгының Казан юридик институты базасында узган чарада шулай ук Россиянең башка хокук саклау ведомстволары вәкилләре һәм Беларусь, Казахстан, Кыргызстан, Таҗикстан, Төрекмәнстан һәм Үзбәкстан Эчке эшләр министрлыклары делегацияләре катнашты.

Семинарны Россия Эчке эшләр министрлыгының шәхси иминлек баш идарәсе башлыгы, полиция генерал-лейтенанты Александр Макаров ачып җибәрде. Мондый семинар-киңәшмә бөтенроссия форматында соңгы мәртәбә 2014 елда Домодедовода квалификация арттыру институты базасында уздырылды, ә алдагы елларда төбәк дәрәҗәсендә оештырылды, дип искәртте ул.

Соңгы ун елда дәүләт масштабында шактый җитди үзгәрешләр булды, бу хокук саклау структураларында эчке иминлекне тәэмин итү алымнарын яңартуны таләп итә.

Татарстан Хөкүмәте исеменнән катнашучыларны премьер-министр Алексей Песошин сәламләде. Ул ассызыклаганча, республикада хокук саклау органнарына ярдәм итү мәсьәләләренә аерым игътибар бирелә.

Аның сүзләренчә, Татарстан Рәисе Рөстәм Миңнехановның ярдәме белән Эчке эшләр министрлыгы хезмәткәрләре өчен өстәмә социаль чаралар – ай саен, квартал саен һәм бер мәртәбә бирелә торган түләүләр каралган. Шулай ук республикада административ биналарны төзү һәм реконструкцияләү проектлары гамәлгә ашырыла.

Песошин шулай ук ел саен үткәрелә торган «Закон территориясе» республика конкурсы турында да искәртте. 2007 елдан бирле узучы конкурс җәмәгать иминлеген тәэмин итүдә актив катнашучы муниципаль җитәкчеләрне, предприятиеләрне һәм мәгариф учреждениеләрен бүләкләүгә юнәлтелгән.

Министрлар Кабинеты башлыгы билгеләп үткәнчә, шәхси иминлек бүлекчәләре Эчке эшләр министрлыгы структурасында төп урын алып тора. Аларның хокук тәртибе органнарын криминал һәм коррупция куркынычларыннан саклау юнәлешендәге эшчәнлеге югары бәягә лаек булды.

Семинар кысаларында актуаль проблемалар турында сөйләшү һәм һөнәри тәҗрибә алышу хокук саклау органнарының нәтиҗәлелеген арттырырга ярдәм итәчәк, дип ышаныч белдерде ул.

Татарстан буенча баш федераль инспектор Виктор Демидов соңгы дистә елларда шәхси иминлекне тәэмин итү системасы хокук саклау структурасының аерылгысыз өлешенә әйләнде, дип өстәде.

Ул билгеләп үткәнчә, хезмәткәрләрнең эше гражданнарның ышанычын ныгытуга һәм көн саен хезмәт бурычын үтәүчеләрнең абруен саклауга юнәлтелгән. Мондый форумнар исә иң яхшы практикалар белән алмашу һәм бердәм стандартлар формалаштыру өчен уникаль шартлар булдыра, диде Демидов.