Песошин һәм Мурзалин Татарстан-Казахстан хезмәттәшлеген үстерү турында сөйләште
Татарстан Хөкүмәте башлыгы Казахстан Премьер-министрына WorldSkills Kazan ачылышында катнашкан өчен рәхмәт сүзләре җиткерде.
(Казан, 4 сентябрь, “Татар-информ”). Бүген Татарстан Премьер-министры Алексей Песошин Казахстанның Казандагы генераль консулы Жанболат Мурзалин белән очрашты. Бу хакта Татарстан Президентының матбугат хезмәте хәбәр итә.
Республиканың Хөкүмәт Йортында узган очрашуда “Россия-Казахстан элемтәләрен ныгытуга юнәлгән” ике як арасындагы хезмәттәшлекне төрле яклап үстерү турында сүз барды.
Шулай ук Алексей Песошин Казахстан Премьер-министры Әскәр Маминга эшче һөнәрләре буенча 45нче WorldSkills Kazan-2019 дөнья чемпионатында катнашкан өчен рәхмәт сүзләрен җиткерде. Ул вакытта казах сәясәтчесе Татарстандагы әйдәп баручы оешмаларны караган иде.
- Моңа кадәр, 2018 елның июлендә, Казахстанның Россиядәге илчелегендә киңәшче булып эшләгән Жанболат Мурзалинны Казахстанның Казандагы Генераль консулы итеп билгеләделәр. Аңа кадәр генераль консул вазифасын Еркин Тукумов башкарган иде.