Архив 1 февраль 2010 20:46

Пермьнән Казанга килгән 5 кеше тоткарланган

Узган ялларда Казанда 2385 транспорт рулендәге зат, 597 җәяүле, юл хәрәкәте кагыйдәләрен бозган өчен, административ җаваплылыкка тартылган

Скопировать ссылку

(Казан, 1 февраль, “Татар-информ”). Узган шимбә көнне иртәнге 9.20 сәгатьтә Казандагы милиция контроль пунктларының берсендә юлларда патруль хезмәте хезмәткәре, тикшерү өчен, Пермьнән килгән 38 яшьлек зат идарәсендәге “Рено-Логан” автомобилен туктаткан. Салонда шушы ук шәһәрдән 4 пассажиры да булган. Тикшерү барышында машина бардачегында табылган «PALL MALL» сигареты пачкасында 1 сигарет һәм аксыл-соргылт төстәге матдә тутырылган бәләкәй пакетлар, «Тропикамид» сиптергеч баллоны һәм 0,5 граммлы 3 шприц табылган. Пермьлеләр исә, мәсьәләгә ачыклык кертү өчен, милиция бүлегенә озатылган, дип “Татар-информ” аша хәбәр сала Казан шәһәре буенча эчке эшләр идарәсенең юлларда патруль хезмәте полкы пропаганда төркеме.

Моннан тыш, кичә, 31 гыйнвар көнне, 15.00 сәгатьтә шундый ук милиция контроль пунктларының берсендә юлларда патруль хезмәте инспекторы туктаткан “ВАЗ-21093” автомашинасы рулендәге 26 яшьлек егетнең транспорт белән идарә итү хокукы бирергә тиешле таныклыгы чын булуына зур шик тудырган. Тикшерү барышында аның андый хокукыннан мәхрүм ителгәнлеге ачыкланган. Шунлыктан, тоткарланган зат милиция бүлегенә китерелгән.

Узган ялларда Казанда 2385 транспорт рулендәге зат, 597 җәяүле, юл хәрәкәте кагыйдәләрен бозган өчен, административ җаваплылыкка тартылган. Транспорт белән идарә иткән 104 кеше каршы як юл тасмасына чыгуда, 290ы куркынычсызлык каешларын куллану кагыйдәләрен үтәмәүдә, 22се исерек килеш рульдә баруда, 69ы пассажир утыртып йөрүдә хилафлыкларда гаепләнә, диелә әлеге мәгълүматта.

Сәхифәләр

Пермьнән Казанга килгән 5 кеше тоткарланган