Мәдәният 12 март 2018 10:31

Пермь шәһәрендә XIII «Пермь талантлары» татар һәм башкорт халыклары иҗаты фестивале үтәчәк

Фестивальдә катнашучыларның географиясе елдан-ел киңәя, конкурсантларның саны да арта бара.

Скопировать ссылку

(Казан, 12 март, «Татар-информ»). 2018 елның 7 апрелендә «Пермь шәһәре Яшьләр сарае» муниципаль автоном учреждениесендә «Пермь каласында милләтара һәм конфессияара татулыкны ныгыту» Муниципаль программасы кысаларында Пермь шәһәре Татар милли-мәдәни мохтарияте Пермь каласы хакимиятенең Мәдәният һәм яшьләр сәясәте департаменты белән берлектә XIII «Пермь талантлары» татар һәм башкорт халыклары иҗаты фестивален үткәрә. Бу хакта Бөтендөнья татар конгрессы матбугат хезмәте хәбәр итә.

Фестивальдә катнашучыларның географиясе елдан-ел киңәя, конкурсантларның саны да арта бара. Бәйге 16 яшькә кадәргеләр һәм 16 яшьтән өлкәнрәкләр арасында «балалар иҗаты», «вокал-соло», «ансамбльдә җырлау», «хореография», «сәнгатьле уку», «үзең иҗат иткән музыкаль әсәрләрне башкару», «инструменталь башкару», «оригиналь жанр», «фольклор» кебек номинацияләр буенча үткәрелә.

Иң яхшы иҗат коллективлары һәм башкаручыларга лауреат дипломнары, истәлекле һәм кыйммәтле бүләкләр тапшырылачак.

Гаризаларны фестивальнең оештыру комитетына җибәрергә кирәк. Гаризаның формасы һәм фестивальнең нигезләмәсе Пермь шәһәре Татар милли-мәдәни мохтарияте сайтында урнаштырылган.

#Бөтендөнья татар конгрессы

Сәхифәләр

Пермь шәһәрендә XIII «Пермь талантлары» татар һәм башкорт халыклары иҗаты фестивале үтәчәк