Җәмгыять 10 октябрь 2005 13:20

Пермь өлкәсенең укытучылар мәктәбе нәтиҗәле эшли

Скопировать ссылку

(Пермь өлкәсе, 10 октябрь, “Татар-информ”, Эльмарт Уразов). Пермь өлкәсе мәгариф хезмәткәрләре белемен күтәрү институтының Барда вәкиллеге ачылуга ун ел тулды. Барда районы милли мәгарифне үстерү буенча Пермь өлкәсе милли балалар учреждениеләре өчен үрнәк һәм үзәк булып тора. Шуңа күрә дә вәкиллекнең нәкъ менә Бардада ачылуы нигезле. Шушы дәвердә үзәк гаять нәтиҗәле эшчәнлек алып барды: ун елда мәгариф хезмәткәрләренең белемен күтәрү буенча курслар һәм күптөрле семинар-практикумнар оештырылды. Аларда өлкәнең татарлар күпләп яшәгән унике районы милли мәгариф учреждениеләреннән 2185 тыңлаучы катнашты, курслар үткәрүдә өлкә институты укытучыларнан тыш, Татарстан һәм Башкортстан галимнәре дә булышты.

“Вәкиллекнең эшчәнлеге алты юнәлеш буенча алып барыла, - ди вәкиллек җитәкчесе Флера Мурланова. Болар: курсларда әзерлек, белем бирүнең эчтәлеген яңарту һәм аның сыйфатын күтәрү буенча эшчәнлек, педагогларның алдынгы тәҗрибәсен тарату, фәнни-гамәли конференцияләрдә катнашу, методик һәм нәшрият эшчәнлеге.

Район мәгариф идарәсе җитәкчесе Зәйнәп Сакаева: “Без башлаган бу эш кирәкле дә, әһәмиятле дә иде, - диде. – Милли мәгарифтә туплаган тәҗрибәбезне башкалар белән дә уртаклашу төп бурыч булып тора”.

Вәкиллек юбилее уңаеннан төрле оешмалардан бик күп котлаулар кабул итте.

Сәхифәләр

Пермь өлкәсенең укытучылар мәктәбе нәтиҗәле эшли