Татар дөньясы 9 декабрь 2025 15:37

Пензада «Тургай» VIII Халыкара балалар фольклор конкурсы узды

Скопировать ссылку

Пенза өлкәсенең М.Ю. Лермонтов исемендәге китапханәсендә «Бердәмлек территориясе» төбәкара мәдәни-патриотик марафоны кысаларында Җиңүнең 80 еллыгына багышланган «Тургай» VIII Халыкара балалар фольклор конкурсы узды. Бу хакта Бөтендөнья татар конгрессының матбугат хезмәте хәбәр итә.

Пенза өлкәсе Хөкүмәтеннән грант ярдәме алган конкурс төбәкнең мәдәни тормышында якты вакыйга булды. Проектның оештыручылары һәм партнерлары – Пенза өлкәсе Мәгариф министрлыгы, Пенза өлкәсе Мәдәният һәм туризм министрлыгы, Пенза өлкәсе Региональ үсеш институты, Пенза шәһәре мәгариф идарәсе һәм Бөтендөнья татар конгрессы.

Балалар фольклор иҗатының байлыгын һәм күптөрлелеген күрсәтеп, конкурска 400дән артык эш җибәрелгән. Жюри эше йомгаклары буенча 37 җиңүче билгеләнде.

Конкурсның төп бүләге – Гран-прины Әлфия Патеева җитәкчелегендә Каменский районының Кикино авылыннан «Тургайлар» фольклор ансамбле яулады. Җиңүчеләргә бүләкне Пенза өлкәсенең Татар милли-мәдәни автономиясе рәисе Винера Мөхәммәтҗанова тапшырды.

Конкурста катнашучыларның географиясе сокландыра: Иркутск, Чиләбе, Омск, Түбән Новгород, Саратов, Самара өлкәләреннән, Татарстаннан, Башкортстан һәм Мордовиядән иҗади коллективлар үз эшләрен җибәргән.

Тамашачылар халык җырларын, биюләрен һәм йолаларын үз эченә алган якты һәм истә калырлык чыгышлар белән хозурланды, диелә хәбәрдә.

Сәхифәләр

Пензада «Тургай» VIII Халыкара балалар фольклор конкурсы узды