Пензада татар теле курсына йөрергә теләүче аз керемлеләргә юл бәясен түләргә җыеналар
Яңа уку елында «Пенза өлкәсенең татар милли-мәдәни автономиясе» төбәк иҗтимагый оешмасы татар телен өйрәнү буенча бушлай курслар башлап җибәрә. Бу турыда автономиянең ВКонтакте челтәрендәге сәхифәсендә хәбәр ителә.
«Шулай ук без аз керемле кешеләр өчен дәресләргә бару өчен түләүне дә тәкъдим итәбез», диелә бу хәбәрдә.
Дәресләр атнага бер тапкыр якшәмбе көннәрендә автономия офисында узачак.
Курсларны Каюм Насыйри институты методисты, татар теле һәм әдәбияты укытучысы Динә Янгура алып бара. Курслар тәмамлангач, һәр укучыга татар телен белү дәрәҗәсен раслаучы сертификат биреләчәк.
«Теләүчеләр беренче дәрестә татар телен белү дәрәҗәсенә анкета тутыра һәм укытучыга тапшыра алачак. Киләчәктә, сезнең дәрәҗәне бәяләгәннән соң, педагог сезнең өчен укытуның индивидуаль методикасын әзерләячәк», диелә хәбәрдә.
Фото: © https://vk.com/publictatarpenza