Татар дөньясы 25 декабрь 2023 21:06

Пензада Муса Бигиевнең 150 еллыгына, Ахун Патеевның 185 еллыгына багышланган очрашу булды

Скопировать ссылку

«Пенза өлкәсенең танылган татарлары» — төбәк Татар автономиясендә шундый исемдәге түгәрәк өстәл утырышы узды. Алар арасында галимнәр, туган якны өйрәнүчеләр, тарихчылар, татар яшьләре вәкилләре һәм төбәкнең танылган татарларының нәсел дәвамчылары бар иде. Бу хакта «Пенза» дәүләт телерадиокомпаниясе хәбәр итә.

Утырыш күренекле татар-теологы Муса Бигиевнең 150 еллыгына һәм Ахун Патеевның 185 еллыгына багышланган. Катнашучылар аларның рухи һәм мәдәни мирасы турында фикер алышты. Ахун Патеев пензалыларга күбрәк ХІХ гасырның икенче яртысында Пенза мөселман үзәге һәм Җәмигъ мәчете җитәкчесе Шәрәфетдин Патеев буларак билгеле. Икесе дә — безнең якташларыбыз, диелә хәбәрдә.

«Мондый әйберләр, минемчә, татар халкының үзенчәлеген саклау өчен әһәмиятле һәм мөһим — татарлар арасында Россияне данлаган кешеләр барлыгын без барыбыз да аңласын өчен», — дип билгеләп үтте Пенза өлкәсенең татар милли-мәдәни автономиясе рәисе Җиһанша Туктаров.

«Хәзер, мәсәлән, без Пенза шәһәренең тарихын басмага әзерлибез, һәм татар мәдәнияте, дин әһелләре турында мәгълүмат бик аз булуы ачыкланды. Һәр язылган юл — ул хәзер алтынга тиң», — дип өстәде Пенза өлкәсенең төбәк үсеше институты ректоры Геннадий Белорыбкин.

Катнашучылар әйтүенчә, мондый җыелышлар күренекле якташлар турында мәгълүматны саклап калу гына түгел, ә аны арттыру, инде тупланган тәҗрибәне системалаштыру ысулы да, диелә хәбәрдә.

#Пенза татарлары

Сәхифәләр

Пензада Муса Бигиевнең 150 еллыгына, Ахун Патеевның 185 еллыгына багышланган очрашу булды