Пенза өлкәсе Усть-Уза авылында «Җәлил укулары» әдәби-музыкаль чарасы узды
Пенза өлкәсе Усть-Уза авылында «Татар мәдәнияте йөзләрдә һәм язмышларда» масштаблы төбәкара мәдәни-агарту марафоны кысаларында Муса Җәлилнең 120 еллыгына багышланган «Җәлил укулары» әдәби-музыкаль чарасы узган. Бу хакта Пенза өлкәсе татар милли-мәдәни автономиясе ВКонтакте төркемендә хәбәр итә.
Бөек татар шагыйре, Советлар Союзы Герое Муса Җәлилнең юбилеена багышланган чарада хакимият, мәгариф һәм милли-мәдәни җәмәгатьчелек вәкилләре, укучылар, студентлар, махсус хәрби операция катнашучыларының гаиләләре җыелган.
Фото: Пенза өлкәсе татар милли-мәдәни автономиясе
Катнашучылар һәм кунаклар өчен бай программа әзерләнгән. Укуларны ачу тантанасында мәктәп укучылары һәм кунаклар башкаруында Муса Җәлил әсәрләре яңгыраган.
Чара кысаларында тематик мәйданчыклар эшләгән. 6 сыйныф укучылары өчен Муса Җәлилнең «Ана бәйрәме» шигыре буенча ачык дәрес үткәрелгән. Шулай ук хәтер экспозициясе тәкъдим ителгән: кунаклар иҗади күргәзмәдә һәм М.Җәлил исемендәге музейда булган.
Чара Татарстан Республикасы Рәисе фондының гражданлык җәмгыятен үстерү өчен гранты ярдәмендә үткәрелде, диелә хәбәрдә.
