Җәмгыять 13 декабрь 2024 12:17

Павел Дуров Telegramның ай саен 1 млн чамасы канал һәм төркемне юкка чыгарып торуын әйтте

Скопировать ссылку

Telegram инде берничә ел ай саен мессенджердан 1 млн чамасы канал һәм төркем, шулай ук 10 млн кулланучыны бетереп тора. Бу чара кагыйдәләрне бозучыларга кагыла. Бу хакта Телеграмга нигез салучы Павел Дуров үзенең социаль челтәрләрендә хәбәр иткән.

Дуров сүзләренчә, модераторлар командасы Телеграмның иминлеге буенча даими эшли. Аларга кагыйдә бозучыларны юк итәргә ясалма фәһем булыша.

Шулай ук Дуров әйткәнчә, бу эшнең күп өлеше кадр артында кала һәм җәмәгатьчелек команданың модерация буенча тырышлыгы турында тулысынча хәбәрдар түгел, ә веб-сайт мәгълүматы инде искергән, чөнки 10 ел яңартылмаган.

«Бу проблеманы хәл итү өчен без сайтыбызда telegram.org/moderation дигән яңа бүлек ачтык. Бу биттә модераторларыбызның шушы елларда эшләгән эше турында сөйләнелә һәм безнең Telegram иминлеген тәэмин итү буенча даими эшебезгә үтә күренмәле күзәтү тәкъдим ителә», – дип язган Дуров постта.

2024 ел башыннан Telegram 15,3 млн төркем һәм каналны блоклаган. Аларның 701 меңендә балаларга карата җенси көч куллану турында язмалар булган, ә 129 меңе терроризм белән бәйле булган.

Сәхифәләр

Павел Дуров Telegramның ай саен 1 млн чамасы канал һәм төркемне юкка чыгарып торуын әйтте