Татарстанда «Питрау» бәйрәменә Россия төбәкләрендәге керәшеннәрне чакырганнар
Мамадыш районының Җөри авылында 16 июльдә «Питрау-2022» керәшен мәдәнияте республика фестивале узачак. Бәйрәмгә Башкортстан, Самара, Киров, Марий-Эл, Удмуртия, Чиләбе керәшеннәрен көтәләр. Яков Емельянов исемендәге мәдәни үзәктә шул турыда хәбәр иттеләр.
«Әлеге төбәкләрдә яшәүче керәшен коллективларын республика күләмендә уздырыла торган «Питрау» бәйрәменә ел саен чакырабыз. Фольклор коллективларга йөрүчеләр олы яшьтә булса да, алар бик теләп катнаша һәм Татарстан керәшеннәре белән очрашу алар өчен зур бәйрәм», – дип сөйләделәр үзәктә.
«Питрау» быел 23нче тапкыр үтәчәк. Чәчәк бәйрәме дип аталган бу көн керәшеннәрдә ыру-нәселнең, туган-тумачаның, кода-кодагыйларның очрашу көне булган булган. Питрау – Зәй районының Сарсаз-Багряж, Кукмара районының Кече Чура, Сарман районының Ләке, Мамадыш районының Албай, Тукай районының Мәләкәс авыллары кебек керәшен авылларның престол бәйрәме санала.