Оренбург һәм Самара өлкәләрендә басылган фәнни-туган якны өйрәнү китаплары тәкъдим ителде
Бүген Бөтендөнья татар конгрессының конференцияләр залында Оренбург һәм Самара өлкәләрендә басылган яңа фәнни-туган якны өйрәнү китапларын тәкъдим итү буенча Бөтенроссия түгәрәк өстәл- конференциясе үтте. Бу хакта Бөтендөнья татар конгрессының матбугат хезмәте хәбәр итә.
Конференцияне ачып, Татарстан Республикасы Дәүләт Советы депутаты, Бөтендөнья татар конгрессы Башкарма комитеты җитәкчесе Данис Шакиров катнашучыларны сәламләде.
Түгәрәк өстәл-конференция программасының беренче өлешендә Оренбург өлкәсендә басылган туган якны өйрәнү китапларын тәкъдим чарасы узды. Ә икенче өлешендә Самара өлкәсендә чыгарылган туган якны өйрәнүгә багышланган китаплар белән таныштыру булды.
Чара барышында Оренбургта чыккан «Великая Отечественная война. Один народ – одна Победа: вклад татар Оренбургской области», «Здесь начинается Родина: история села Карагузино», «Врата вечности», «Кабан авылы тарихы» китаплары, Самарада басылган «Два села – одна судьба: очерки истории Карабикулово и Татарского Абдикеево» китабы, «Татары России» журналы презентацияләнде.
Казанда яшәүче якташлар җәмгыяте вәкилләре – Оренбург өлкәсендә туып-үскәннәр, әйдәп баручы галимнәр, тарихчы-төбәкне өйрәнүчеләр, туган якны өйрәнүчеләр, педагоглар, мәдәният хезмәткәрләре, киң мәгълүмат чаралары вәкилләре, җәмәгатьчелек чыгыш ясады.
Әлеге чарага йомгак ясалып, китап авторлары һәм туган якны өйрәнү хәрәкәте активистлары бүләкләнде. Түгәрәк өстәл-конференция кысаларында фәнни һәм туган якны өйрәнү китаплары күргәзмәсе оештырылды.
Чараның модераторы Бөтендөнья татар конгрессы Башкарма комитетының Татар төбәк тарихын өйрәнүчеләре белән эшләү комитеты җитәкчесе Альберт Борһанов булды.
Россия халыклары бердәмлеге елы, Татарстан Республикасында хәрби һәм хезмәт батырлыгы елы, шулай ук Габдулла Тукай, Муса Җәлил һәм күренекле татар галимнәренең юбилейлары уңаеннан уздырылган чара Бөтендөнья татар конгрессы һәм төбәк туган якны өйрәнү җәмгыятьләре тарафыннан оештырылды.