Омск өлкәсе татарларының "Нур" ансамбле 15 еллыгын бәйрәм итә
Юбилей концерты "Төньяк" татар мәдәни-ял үзәгендә булачак.
(Казан, 29 гыйнвар, “Татар-информ”). Омск өлкәсенең Тара шәһәре “Дуслык йорты" милли мәдәният берләшмәсе татар мәдәнияте үзәгенең “Нур” халык ансамбле 15 еллык юбилеен бәйрәм итә. Бу турыда Омск өлкәсе татар милли-мәдәни мохтарияте матбугат хезмәте хәбәр итә.
21 апрельдә "Төньяк" татар мәдәни-ял үзәгендә концерт булачак.
"Нур” ансамбле сәхнәгә беренче тапкыр 2004 елның 25 апрелендә чыга. 2016 елда “Нур” вокал ансамбле Тобольск шәһәрендә “Иске җыен” IX Халыкара тарихи-мәдәни мирас фестивалендә III дәрәҗә дипломант булган. Коллектив “Түгәрәк уен” Бөтенроссия татар фольклор бәйгесендә һәм башка шундый зур чараларда катнашкан.
”Нур” ансамбленең иҗади эшчәнлеге татар халкының гореф-гадәтләрен саклауга һәм популярлаштыруга юнәлдерелгән. Ансамбль эшләгән елларда зур репертуар туплаган, алар арасында татар композиторларының әсәрләре дә күп, диелгән әлеге хәбәрдә.