Җәмгыять 2 гыйнвар 2017 04:00

Олы Әтнәдә Яңа елны урамда бәлеш ашап бәйрәм иткәннәр

Район үзәгенең Сарман урамында яшәүчеләрнең кызыклы традициясе турында "Әтнә таңы" газетасы яза.

Скопировать ссылку

(Казан, 2 гыйнвар, "Татар-информ", "Әтнә таңы", Сүрия Мингатина). Олы Әтнәнең Сарман урамында яшәүчеләренең кызыклы традициясе бар - РФ президенты котлавыннан соң, алар урамга чыгып бәйрәм итә һәм урамда бәлеш ашыйлар.

"Салют атканнарын карап хозурландык. Җор теллеләр монда да сүзсез калмады, “Монысын байлар ата, ә монысы безнеэ кебекләрнеке...” дип аңлатма бирә бардылар", - дип яза "Әтнә таңы".

"Хет кемнеке булсын, салют - салют инде. Бетте бугай дип, үзебезнең урамның салютын аттык. “Безнең урам да төшеп калганнардан түгел, анысын Сәфәровлар гаиләсе бүләк итте. Җырчы егетебез Фаил Сәфәров атты быел салютны.

Шуннан соң иң кызыгы башланды инде- Бәлеш. Ит бәлешен быел больницада эшләүче Раиләбез пешерде. “Бик тырыштык, гаилә белән пешердек “, - дип, Яңа ел белән котлады гармунчы Фәритебез. Шиһаповлар икәнен аңладыгыз инде.

Ул бәлешнең тәмлелекләре! Аллаһы Тәгалә рәхмәте инде бу, өйдә утырып ашасаң бу кадәр тәмле дә булмый әле ул, ә монда урамда, өстәл әзерләп, бөтен тирә- күрше берсен-берсе котлап, кыстап ашаганда искитмәле! Күз алдына китергәнсездер инде, пар бөркеп торган бәлеш... Янындагы шешәләргә дә әллә ни игътибар бирелмәде кебек. Тотып куюлар, котлаулар, теләкләр теләүләр... күңел ачулар...

Олылар гына түгел, яшьләр, балалар да да шунда, бергә. Бергәлеккә, бердәмлеккә ни җитә...- Аллага шөкер, менә шулай яшибез без. Яман күзләрдән дә Аллаһы Тәгалә үзе сакласын...”Киләсе елның соңгы төнендә дә барыбыз да бергәләп каршы алсак иде”,- дип теләдек. Амиин, дигән сәгатькә туры килсен", - дип яза газета.

#бәлеш

Сәхифәләр

Олы Әтнәдә Яңа елны урамда бәлеш ашап бәйрәм иткәннәр