Рөстәм Миңнеханов хезмәт җитештерүчәнлеген арттыру буенча киңәшмәдә катнашты

Татарстан илдә беренчеләрдән булып хезмәт җитештерүчәнлегенең төбәк программасын эшләде.

(Казан, 28 август, "Татар-информ"). Бүген Россия Федерациясе икътисадый үсеш министры Максим Орешкин «Хезмәт җитештерүчәнлеген арттыру һәм халыкны эш белән тәэмин итүгә ярдәм» өстенлекле программасын гамәлгә ашыру мәсьәләсе буенча видеоконференция-элемтә режимында киңәшмә уздырды. Киңәшмәдә Татарстан Республикасы Президенты Рөстәм Миңнеханов та катнашты, дип хәбәр ителә Президентның матбугат хезмәтендә.

Рөстәм Миңнеханов икътисадның һәм сәнәгатьнең барлык тармакларында да хезмәт җитештерүчәнлеген арттыру өчен Татарстан Республикасында башкарыла торган чаралар турында сөйләде. Аның искәртүенчә, төбәктә хезмәт җитештерүчәнлеген арттыру буенча 10 елдан артык инде сакчыл җитештерү элементлары гамәлгә кертелә. Татарстан илдә беренчеләрдән булып хезмәт җитештерүчәнлегенең төбәк программасын эшләде. Моннан тыш, ресурс үзәкләре базасында югары квалификацияле кадрлар әзерләү дәвам итә (2017 елга республикада 25 ресурс үзәге эшли). Бизнес өчен заманча инфраструктура – технопарклар, инновацион үзәкләр, сәнәгать мәйданчыклары булдырыла. Шул исәптән, Рөстәм Миңнеханов билгеләп үткәнчә, муниципаль районнарда сәнәгать мәйданчыклары булдыруга басым ясала – бүген мондый 62 мәйданчык бар.

Татарстан хезмәт җитештерүчәнлеген арттыру буенча шактый гына тәҗрибә туплады, диде Рөстәм Миңнеханов. Энергияне сак тоту технологияләре үзәге базасында компетенцияләр үзәге булдырылды. Ул шулай ук Татарстанны сынау төбәге итеп сайлаган өчен рәхмәтен дә белдерде. «Без бу өлкәдә җыелган тәҗрибәбез белән уртаклашырга әзер», – дип белдерде Татарстан Республикасы Президенты.

Максим Орешкин, искәрткәнчә, «Хезмәт җитештерүчәнлеген арттыру һәм халыкны эш белән тәэмин итүгә ярдәм» өстенлекле программасын эшләү ярты ел элек башланды, якын киләчәктә Стратегик үсеш һәм өстенлекле программалар буенча Россия Федерациясе Президенты каршындагы Совет Президиумында бу программа паспорты тәкъдим ителәчәк.

Татарстанда хезмәт җитештерүчәнлеген арттыру өлкәсендә гамәлгә ашырылучы чаралар турында җентекләбрәк Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Альберт Кәримов сөйләде. Хезмәт җитештерүчәнлеге – көндәшлеккә сәләтлелекнең төп өлеше, диде ул.

Альберт Кәримов билгеләп үткәнчә, Татарстанның 160тан артык предприятиесе үз эшчәнлегендә сакчыл җитештерү технологияләрен файдалана.