Рөстәм Миңнеханов унике ел эчендә рекордлы күләмдә уңыш җыеп алынганын әйтте

Рөстәм Миңнеханов республикада иң яхшы хуҗалыклар исемлегендә Актаныш, Азнакай, Буа хуҗалыкларын атады.

(Казан, 24 сентябрь, «Татар-информ», Гөлнар Гарифуллина). Республикада унике ел эчендә рекордлы күләмдә - 5,4 млн тонна бөртеклеләр уңышы җыеп алынган. Бу хакта Татарстан Президенты Рөстәм Миңнеханов Дәүләт Советына еллык Юлламасында әйтте.

«Авыл хуҗалыгы — икътисадның мөһим тармагы. 2020 ел уңышлы булды», — диде Президент. Ул Әтнә районы урып-җыюны беренче булып төгәлләгәнен әйтте.

Рөстәм Миңнеханов республикада иң яхшы хуҗалыклар исемлегендәге Актаныш, Азнакай, Буа хуҗалыкларына алкышлауны сорады һәм рәхмәт сүзләрен җиткерде.

Президент аграр тармакта техник модернизация нәтиҗәсендә авыл хезмәтчәненең терлек азыгы хәстәрләү буенча эше җиңеләйгәнен билгеләп узды.

«Соңгы елларда шәхси хуҗалыкларга, фермерларга ярдәм чаралары күрсәтелә. Фермер хезмәте җиңел түгел. Алдагы ун еллыкта тагын да үстерү турында уйларга кирәк. Хакимият органнары инициативалы фермерларга теләктәшлек күрсәтергә тиеш», — диде Миңнеханов һәм авыл халкының эшлеклелек активлыгы семинарлары дәвам итүен теләде.