Рөстәм Миңнеханов «Татнефть» директорлар советы утырышын уздырды

«Татнефть» республикада тотрыклы экосистеманы формалаштыру өчен җаваплылыкны үз өстенә алды.

(Казан, 24 февраль, «Татар-информ»). Бүген Казанда Татарстан Президенты Рөстәм Миңнеханов рәислегендә В. Д. Шашин исемендәге «Татнефть» ГАҖ Директорлар советы утырышы узды. Утырышта 2021 елның гыйнварында бюджет үтәлеше нәтиҗәләре каралды, 2021 елның мартына бюджеты расланды, дип хәбәр итте Татарстан Президентының матбугат хезмәте.

Директорлар советы 2020 елда нефть чыгару буенча чикләүләр һәм пандемиягә бәйле рәвештә кайбер проектларны гамәлгә ашыру вакытын күчерү шартларында гамәлгә ашырылган инвестицион программаның үтәлеше турында мәгълүмат тыңлады.

Советта катнашучыларга COVID-19 эпидемиясе күренешләрен булдырмау һәм кисәтү өчен «Татнефть» оештырган чаралар турында сөйләделәр. Бу юнәлештә эш дәвам итәчәк. «Татнефть»тә үткәрелә торган вакцинацияне исәпкә алып, пандемия нәтиҗәләрен киметү һәм гадәти тормыш рәвешенә акрынлап кайту һәм бизнес алып бару буенча чаралар эшләнәчәк һәм тормышка ашырылачак.

Директорлар советы «Татнефть» тарафыннан сервис предприятиеләренә ярдәм итү һәм төбәктә икътисади һәм социаль проблемаларны киметү өчен күрелгән чаралар турындагы хисапны тыңлады.

Компаниянең тотрыклы үсеш максатларына ирешүе кысаларында Директорлар советы шәһәрләрнең һәм торак пунктларның ачыклыгын, куркынычсызлыгын, тормыш тотрыклылыгын һәм экологик тотрыклылыгын тәэмин итү өчен тормышка ашырыла торган чараларны карады. «Татнефть» үз эшчәнлегендә республикада тотрыклы экосистеманы формалаштыру өчен җаваплылыкны үз өстенә алды.

Директорлар советы «Тотрыклы шәһәрләр һәм торак пунктлар» максатын тормышка ашыру юнәлешләрен, шулай ук аңа ирешү буенча юл картасын хуплады.

Компания өстенлекле юнәлешләр буларак социаль инвестицияләрнең нәтиҗәлелеген арттыру, территорияләрне үстерүнең комплекслы программаларын тормышка ашыру, шәһәр идарәсенең актив цифрлы трансформациясе, ачык куркынычсыз мохит булдыру, квалификацияле кадрлар агымын тәэмин итүне билгеләде, диелә хәбәрдә.